Mga Pilipino, naghihirap pero mga pulitiko, Halalan 2022 ang pinaghahandaan

Posted by watchmen
September 10, 2021
Posted in OPINION

INSPIRASYON SA BUHAY: “Kung hindi na kayo makikinig sa tinig ng Diyos at hindi na kayo susunod sa Kaniyang mga utos, padadalhan Niya kayo ng mga sumpa… Patuloy kayong gigipitin, pagnanakawan at sasamsaman ng inyong mga ari-arian at darambungin ang iyong yaman, ngunit walang sasaklolo sa inyo.” (Deuteronomio 28:15, 29, Ang Tanging Daan Bibliya).

***

SAMBAYANAN, NAMIMIGHATI DAHIL SA COVID, BAHA, BAGYO, KORAPSIYON, AT DROGA, PERO MGA PULITIKO ABALA NAMAN SA PAGHAHANDA PARA SA HALALAN 2022: Pulitika para lamang sa kapakanang pangsarili, pampamilya, pampulitika, at pang-kaalyado, at hindi kailanman para sa interest ng sambayanan. Ito ang nakakalungkot na katotohanang pinagmamasdan ng milyon-milyong mga Pilipino sa kasalukuyang mga araw, sa harap ng mga mabibigat at maseselan na problema ng bansa.

Kasama sa mga problemang ito ang ‘di pa rin mapigilang paglobo ng bilang ng mga Pilipinong nagkakasakit at namamatay dahil sa COVID-19 araw-araw; ang hirap at siphayong dulot ng nagngangalit na mga hangin, bumubuhos at nag-aalimpuyong ulan sa halos buong bansa, at rumaragang baha sa lahat ng dako, na nagbubunga ng kapinsalaan ng mga bahay, ng mga taniman at iba pang mga ari-arian, at, sa ilang mga sawimpalad na Pilipino, ng pagka-kitil ng kanilang mga buhay.

Nandiyan din ang problema ng patuloy na korapsiyon at pandarambong sa kaban ng bayan, at ‘di-mapigil-pigil na pamamayagpag ng ilegal na droga, na mga dayuhan pa ang nangangasiwa sa ating sariling bayan.

Sa kabila ng lahat ng ito, noong ika-walo ng setyembre 2021, sa halip na kumilos laban sa mga problema ng bayan, ginaganap sabay-sabay ang sinasabing pambansang kumbensiyon ng dalawang partido pulitikal kung saan abala ang mga pulitiko, kasama ang mga pinuno ng pamahalaang namumuno sa mga partido, sa pagpapakilala sa kanilang magiging mga pambato sa halalan sa susunod na taon.

 

***

MGA PARTIDO-PULITIKAL, AT MGA PULITIKO, NAGSASAGAWA NG MGA KUMBENSIYON PARA PILIIN NA ANG KANILANG MGA PAMBATO SA 2022: At sa halip na tulungan ang bayan, patuloy sa bangayan ang mga nakaupong opisyales ng bansa na nasa mga sensitibong posisyon,na inaasahan sananglalaban sa pandemya at sa mga mas nakakahawa at mas makamandag na mga variants at mga uri nito.

Sa halip na tumulong, nagbabatuhan ang mga pulitiko ng mga akusasyong nagpapakita, ‘di na lamang ng mga katiwalian ng kani-kanilang inaakusahang mga kalaban, kundi ng sarili nila mismo, at ng mga tanggapan o ahensiya na kanilang pinamamahalaan.

Ang isang kasapi naman ng pamilyang matagal na humawak sa kapangyarihan sa Pilipinas ay nagpapahayag na hindi pa niya matiyak kung kasama nga siya sa Halalan 2022 dahil, sa kaniyang pananaw, wala pang katiyakan sa pulitika ngayon.

Pinupuna din ng marami ang kawalan ng kabuuang pagtugon sa hiling ng mga frontliners, o mga health workers lalo na sa gobyerno, na ibigay na sa kanila ang kanilang special allowances, at ang iba pang benepisyong pinansiyal, upang magamit ang mga ito para sa kapakanan, kung hindi man ng frontliners, ay ng kanilang mga mahal sa buhay.

Ganundin, hindi kinakikitaan ang mga autoridad ng pagtugon sa krisis sa kakulangan ng mga medical and hospital facilities, na nagiging dahilan ng pagtanggi ng maraming mga ospital at mga clinics sa bansa na tumanggi na sa pagtanggap ng mga pasyente, lalo na ‘yung nahawa ng COVID-19.

Puno na kasi ang mga ospital na ito, at wala ng mapaglagyan ng mga nagnanais makakuha ng atensiyong medikal. Lumalabas din na hindi na din natutugunan ang mga batayang pangangailangan sa mga pasyenteng lumulubha ang kalagayan sa paglakad ng mga oras, gaya ng oxygen supply, at maging ng mga tinatawag na ventilators upang tulungang makahinga ang mga may COVID-19.

 

***

MARAMING PULITIKO ‘DI ALINTANA ANG HIRAP NG MGA TAO KASI ALAM NILA NA MABABAYARAN DIN ANG KANILANG MGA BOTO: Ikinamamangha ng marami na sa harap ng mga mabibigat na dalahing ito ng bayan, nakukuha ng maraming mga pulitiko at ng mga di mabilang na pinunong Pilipino na unahin ang kanilang pagtakbo sa pulitika sa susunod na halalan.

Mas minamatamis nila na nakikita silang nagpupulong-pulong at nagsusulong ng kani-kanilang mga kinikilingang kandidato sa mga sensitibong posisyon. Lumilitaw na mas minamahalaga ng mga pinuno at mga pulitikong ito ang kanilang magiging panalo sa Halalan 2022, kaysa sa kapakanan ng mas nakararaming Pilipino.

Marami ang nagbibigay ng kanilang mga dahilan kung bakit ganito ipinagwawalang-bahala ng maraming mga pulitiko ang sambayan at iniiwan ang mga pilipino sa kanilang mga kasawian sa buhay.

Magkaganunman, ang isa sa mga pinaka-mabigat na pananaw ay yung nagsasabi na alam kasi ng maraming mga pulitiko na tiwali din naman ang karamihan sa sambayanang boboto sa Halalan 2022, dahil mabibili din lamang naman ang mga ito sa halagang P500 bawat boto, pagdating ng eleksiyon.

 

***

REAKSIYON? Tawag na: 0947 553 4855. Email: batasmauricio@yahoo.com. MANOOD, MAKINIG: Kakampi Mo Ang Batas, www.facebook.com/attybatas, www.facebook.com/radyopilipino, YouTube.com/kakampimoangbatas, Radyo Pilipino stations nationwide, at mga affiliated radio stations ng Kiss FM network, Sunrise News network, Power News Broadcasting Network, 95.5. J FM network./WDJ

 

 

 

 

 

 

Leave a Reply

Your email address will not be published. Required fields are marked *